இஸ்ரேலியப் பிரதமர் பெஞ்சமின் நெதன்யாகு அமெரிக்க நிர்வாகத்தின் மீது தொடர்ந்து கடுமையான அழுத்தத்தை அளித்து வரும் நிலையில் வரும் நாட்களில், அமெரிக்க ஜனாதிபதி டொனால்ட் ட்ரம்ப், ஈரானில் உள்ள ஒரு நிலத்தடி அணுசக்தி நிலையத்தைக் குறிவைத்து, அதன் மீது ஒரு வரையறுக்கப்பட்ட அணு ஆயுதத் தாக்குதலைத் தொடுக்க முடிவு செய்வதற்கு அதிக ஆபத்து உள்ளது என்றும்,இந்திய செய்தித்தாளான 'ஹிந்துஸ்தான் டைம்ஸ்' செய்தி வெளியிட்டுள்ளது.
பிரபல அமெரிக்க அரசியல் விமர்சகரான டக்கர் கார்ல்சன், தனது அதிகாரபூர்வ 'X' கணக்கில் வெளியிட்ட ஒரு நீண்ட பதிவில் தெரிவித்த இந்த சர்ச்சைக்குரிய தகவலை மேற்கோள் காட்டி, ஹிந்துஸ்தான் டைம்ஸ் செய்தித்தாள் இதைச் சுட்டிக்காட்டுகிறது.
இருப்பினும், கார்ல்சன் இந்தக் கூற்றை உறுதிப்படுத்த எந்த அதிகாரபூர்வ ஆதாரத்தையும் முன்வைக்கவில்லை என்றும், இதுவரை அமெரிக்க அல்லது இஸ்ரேலிய அதிகாரிகள் இது குறித்து அதிகாரபூர்வமாக உறுதிப்படுத்தவில்லை என்றும் அந்த செய்தித்தாள் வலியுறுத்துகிறது.
மத்திய ஈரானில் உள்ள "பிக்காக்ஸ் மலை"
கார்ல்சனின் கூற்றுப்படி, இந்தத் தாக்குதலின் முதன்மை இலக்கு, மத்திய ஈரானில் உள்ள "பிக்காக்ஸ் மலை" எனப்படும் மிகவும் பாதுகாப்பான நிலத்தடி அணுசக்தி நிலையமாகும். தெஹ்ரான் யுரேனியம் செறிவூட்டலை மீண்டும் தொடங்கியுள்ளதாகவும், இந்த ஆழமான நிலத்தடி தளத்தை அழிக்கும் திறன் எந்தவொரு வழக்கமான அமெரிக்க பதுங்குகுழி தகர்ப்பு ஆயுதத்திற்கும் இல்லாததால், அணு ஆயுதத்தைப் பயன்படுத்துவதே ஒரே இராணுவ வழி என்றும் இஸ்ரேலிய உளவுத்துறை நம்புவதாக கார்ல்சன் கூறுகிறார்.
இந்தத் தாக்குதலுக்கு ஒப்புதல் அளிக்குமாறு இஸ்ரேலியப் பிரதமர், ட்ரம்பை வலுவாக வலியுறுத்தி வருவதாக கார்ல்சன் கூறுகிறார். மேலும், "நெதன்யாகு இதற்கு அதிக அழுத்தம் கொடுத்து வருகிறார். உள் வட்டாரங்களின்படி, நெதன்யாகு தினமும் இது குறித்து ட்ரம்புடன் தொலைபேசியில் பேசி வருகிறார்" என்றும் அவர் குறிப்பிடுகிறார்.
பாதுகாப்புச் செயலாளர் பீட் ஹெக்ஸெத், வெளியுறவுச் செயலாளர் மார்கோ ரூபியோ மற்றும் சிஐஏ இயக்குநர் ஜோன் ராட்க்ளிஃப் உட்பட ட்ரம்ப் நிர்வாகத்தின் பல மூத்த அதிகாரிகளும் ஈரானுக்கு எதிரான புதிய இராணுவ நடவடிக்கைகளை ஆதரிப்பதாக அவர் குற்றம் சாட்டுகிறார்.
இஸ்ரேலியப் பிரதமரின் அரசியல் நெருக்கடி குறித்துப் பேசும் கார்ல்சன், கடந்த வாரத் தேர்தல் முடிவுகளைத் தொடர்ந்து நெதன்யாகு மிகவும் இக்கட்டான நிலையில் தனிமைப்படுத்தப்பட்டுள்ளார் என்று தெரிவிக்கிறார்.
நெசெட்டில் 61 இடங்கள் பெரும்பான்மையுடன் அரசாங்கத்தை அமைக்க, ட்ரம்ப் இஸ்ரேலிய அரசியலில் நேரடியாகத் தலையிட்டு ஒரு ஒப்பந்தத்தை ஏற்படுத்த வேண்டும் என்றும், நெதன்யாகு ட்ரம்புடன் நெருக்கமாக இருந்து இந்தப் போரைத் தொடங்குவது அவசியமாகிவிட்டது என்றும் அவர் சுட்டிக்காட்டுகிறார்.
மேலும், ஈரானுக்கு எதிரான இறுதித் தாக்குதலுக்கு ஐக்கிய அரபு அமீரகத்தின் (UAE) ஆதரவைக் கோருவதற்காக நெதன்யாகு செப்டம்பர் 27 அன்று இரகசியமாக அபுதாபிக்குச் சென்றார், ஆனால் அந்த அமீரகம்இந்த கோரிக்கைக்கு மறுத்துவிட்டது என்று கார்ல்சன் வெளிப்படுத்துகிறார்.
மேலதிகமாக, கத்தாரின் தோஹாவில் ஈரானுடன் விவாதிக்கப்பட்டு வரும் சமாதானத் திட்டத்தை முன்னாள் ஜனாதிபதி பராக் ஒபாமா எதிர்க்கிறார் என்றும் கார்ல்சன் கூறினார். இந்த மோதலைத் தீர்ப்பதற்காக ஈரானியப் பிரதிநிதிகளுக்கும் கத்தார் மத்தியஸ்தர்களுக்கும் இடையே தோஹாவில் மறைமுகப் பேச்சுவார்த்தைகள் ஏற்கனவே நடைபெற்று வருவதை ரொய்ட்டர்ஸ் உறுதிப்படுத்தியுள்ளது.
தாக்குதல் தொடர்பாக இறுதி முடிவை எடுக்காத ட்ரம்ப்
ட்ரம்ப் ஒரு இராஜதந்திரத் தீர்வை விரும்பினாலும், பேச்சுவார்த்தைகள் தோல்வியுற்றால் இராணுவ நடவடிக்கைக்கான சாத்தியத்தையும் அவர் திறந்து வைத்துள்ளார்.
இருப்பினும்,மேலதிக தாக்குதல்கள் குறித்து ட்ரம்ப் இன்னும் இறுதி முடிவு எடுக்கவில்லை என்று வெளியுறவுத்துறை செயலாளர் மார்கோ ரூபியோவும் அசோசியேட்டட் பிரஸ்ஸும் சுட்டிக்காட்டியுள்ளன.
துணை ஜனாதிபதி ஜே.டி. வான்ஸ் மற்றும் ட்ரம்பின் சிறப்புப் பிரதிநிதி ஸ்டீவ் விட்காஃப் ஆகியோர் அமைதியான பாதையை வலியுறுத்துவதாகவும், ஈரானுடன் ஒரு உடன்பாட்டை எட்ட முடியும் என்று வாதிடுவதாகவும், ட்ரம்ப், அவர்கள் சொல்வதைக் கேட்டு வருவதாகவும் கார்ல்சன் மேலும் தெரிவித்துள்ளார்.
No comments: