முதலாவது சிறுவர் சிறுநீரக மாற்று அறுவை சிகிச்சை வெற்றி; பணி தொடரும்! - 16 வயது சிறுவனும் தந்தையும் நலனுடன்

முதலாவது சிறுவர் சிறுநீரக மாற்று அறுவை சிகிச்சை வெற்றி; பணி தொடரும்!
- 16 வயது சிறுவனும் தந்தையும் நலனுடன்




பொலன்னறுவையில் உள்ள சீன – இலங்கை நட்புறவு தேசிய சிறுநீரகவியல் விசேட மருத்துவமனையில், 16 வயது சிறுவனுக்கு மே 07 ஆம் திகதியன்று சிறுநீரக மாற்று அறுவை சிகிச்சை வெற்றிகரமாக மேற்கொள்ளப்பட்டுள்ளது.

நாட்டில் சிறுவர் மருத்துவமனை அல்லாத ஒரு புறநகர் மருத்துவமனையில் மேற்கொள்ளப்பட்ட முதலாவது சிறுவர் சிறுநீரக மாற்று அறுவை சிகிச்சை மிகவும் வெற்றிகரமாக அமைந்தது எனவும், இனிமேல் சுகாதார மற்றும் வெகுசன ஊடக அமைச்சின் வழிகாட்டல் மற்றும் அறிவுறுத்தல்களின் கீழ், அனைத்து இலங்கை சிறுவர்களின் தேவைகளுக்கு ஏற்ப சிறுநீரக மாற்று அறுவை சிகிச்சைகளை மேற்கொள்ள தங்கள் மருத்துவமனை தயாராக உள்ளதாகவும், பொலன்னறுவையிலுள்ள சீன – இலங்கை நட்புறவு சிறுநீரக மருத்துவமனையின் பணிப்பாளர், வைத்திய நிபுணர் தில்கா சரணசிங்க உள்ளிட்ட, அறுவை சிகிச்சையை மேற்கொண்ட விசேட வைத்தியர் குழுவினர் தெரிவித்துள்ளனர்.

நேற்று (26) இது தொடர்பில் விசேட ஊடக சந்திப்பொன்று இடம்பெற்ற போதே அவர்கள் இதனைத் தெரிவித்தனர்.

மின்னேரியா பகுதியில் வசிக்கும் 16 வயது சிறுவனுக்கான சிறுநீரகம் அச்சிறுவனின் தந்தையால் தானமாக வழங்கப்பட்டது என்றும், அச்சிறுவனும் தந்தையும் தற்போது முழுமையாகக் குணமடைந்து வருகின்றனர் என்றும் மருத்துவக் குழுவினர் சுட்டிக்காட்டினர்.

மருத்துவமனையின் முதலாவது வெற்றிகரமான, சிறுவருக்கான சிறுநீரக மாற்று அறுவை சிகிச்சை அந்த மருத்துவமனைக்கு ஒரு சாதனை என்றும் , அறுவை சிகிச்சை செய்துகொண்ட நோயாளியும், சிறுநீரகத்தை வழங்கிய நோயாளியின் தந்தையும் நலமாக உள்ளனர் என்றும் அவர் கூறினார்.

மருத்துவமனையில் முதலாவது சிறுவர் சிறுநீரக மாற்று அறுவை சிகிச்சை வெற்றிகரமாக நடத்தப்பட்டமையானது, சிறுவர்கள் சிறுநீரகப் பராமரிப்பு சேவைகளில் ஒரு மைல்கல்லாக அமைந்துள்ளதாக, சிறுவர்கள் மற்றும் சிறுநீரகவியல் நிபுணர் வைத்தியர் வேணுஜய பண்டார,

இம்மருத்துவமனையில் சிறுவர்கள் சிறுநீரக மாற்று அறுவை சிகிச்சை சேவைகள் 2025ஆம் ஆண்டின் நடுப்பகுதியில் இருந்து ஆரம்பிக்கப்பட்டதாக அவர் இங்கு தெரிவித்தார்.

அதன் பிறகு, நீண்டகாலமாக சிறுநீரக நோயால் பாதிக்கப்பட்டு மருத்துவமனைக்கு வந்த ஒரு சிறுவனுக்கு இந்த அறுவை சிகிச்சை செய்யப்பட்டதாகவும், குழந்தையின் தந்தையும் அனைத்துப் பரிசோதனை நடவடிக்கைகளிலும் பங்கேற்றதாகவும் அவர் கூறினார். குழந்தைப் பருவ சிறுநீரக நோயால் ஏதேனும் சிக்கல் உள்ள எந்தவொரு பெற்றோரும் இந்த மருத்துவமனையை அணுகலாம் என்றும், அந்தச் சேவைக்காக மருத்துவமனையும் அனுபவம் வாய்ந்த பணியாளர்களும் தயாராக இருப்பதாகவும், அதற்கான அனைத்து வசதிகளுடனும் மருத்துவமனை வலுவாக இருப்பதாகவும் அவர் கூறினார்.

அத்துடன், சிறுவர்களிடையே நீண்டகால சிறுநீரக நோய்களுக்குப் பிறவி சிறுநீரக மற்றும் சிறுநீர்ப் பாதை கோளாறுகளே முக்கியக் காரணங்கள் என்றும், ஒவ்வொரு மாகாணத்திலும் சிறுவர் சிறுநீரகவியல் மருத்துவமனைகள் நிறுவப்பட்டுள்ளன என்றும் , முறையான மருத்துவச் செயல்பாடு இல்லாததால் இரண்டு சிறுநீரகங்களும் செயலிழக்க வாய்ப்புள்ளது என்றும் அவர் சுட்டிக்காட்டினார்.

நிபுணர்கள், மருத்துவர்கள், தாதியர்கள் உள்ளிட்ட மருத்துவமனையின் அனைத்து ஊழியர்களின் அர்ப்பணிப்பினாலேயே இந்தச் சாதனை சாத்தியமானது என்று இங்கு தெரிவிக்கப்பட்டது.

அத்துடன், எவ்வித அச்சமோ, சந்தேகமோ இன்றி சீன – இலங்கை நட்புறவு சிறுநீரக மருத்துவமனைக்கு வந்து, சிறுவர்களுக்கான சிறுநீரக மாற்று அறுவை சிகிச்சை சேவைகளைப் பெற்றுக்கொள்ளுமாறு பொதுமக்கள் அறிவுறுத்தப்பட்டுள்ளனர்.

இரத்த நாள திசு மற்றும் இரத்தக் குழாய் மாற்று அறுவை சிகிச்சையில் நிபுணரான டாக்டர் மனுஜய கோடகந்தகே, வயது வந்த நோயாளிக்கு செய்யப்படும் சிறுநீரக மாற்று அறுவை சிகிச்சையை விட, இந்த சிறுவர்களுக்கான சிறுநீரக மாற்று அறுவை சிகிச்சை மிகவும் சிக்கலான மற்றும் தொழில்நுட்ப ரீதியாக சவாலான ஒரு படி என்று கூறினார்.

நாட்டில் சிறுவர்களுக்கான சிறுநீரக மாற்று அறுவை சிகிச்சைகளைச் செய்யும் இரண்டு முக்கிய நிறுவனங்களைத் தவிர, இந்த மருத்துவமனை மூலம் இந்த சேவையை வழங்க முடிவது ஒரு தனித்துவமான வாய்ப்பு என்றும், இந்த சிறப்புச் சாதனையானது குழுப்பணியின் மூலம் அடையப்பட்டது என்றும் அவர் கூறினார். எந்தவித சிக்கல்களும் இன்றி, இரண்டரை முதல் மூன்று மணி நேரத்திற்குள் இரண்டு அறுவை சிகிச்சைகள் வெற்றிகரமாக மேற்கொள்ளப்பட்டதாகவும் அவர் தெரிவித்தார்.

மயக்கவியல் நிபுணர் டாக்டர் ஜீவக குலதிஸ்ஸ தெரிவிக்கையில், இது ஒரு சவாலான அறுவை சிகிச்சை என்றும், சிக்கல்களைத் தவிர்ப்பதற்காக குழந்தையையும் தந்தையையும் அறுவை சிகிச்சைக்குத் தயார்படுத்தி, சிறுவனுக்கும் தந்தைக்கும் இரண்டு அறுவை சிகிச்சைகளைச் செய்து, ஒரு குழுவாகப் பணியாற்றியதன் மூலம் முதல் குழந்தை சிறுநீரக மாற்று அறுவை சிகிச்சை வெற்றிகரமாகச் செய்யப்பட்டது என்றும் தெரிவித்தார்.

சிறுநீரக மாற்று அறுவை சிகிச்சை செய்துகொண்ட சிறுவனின் தாய், தன் பிள்ளையின் நோயைப் பற்றி அறிந்ததிலிருந்து வாழ்க்கையே வெறுப்படைந்துவிட்டதாகவும், அந்த நோய்க்காகச் செய்ய வேண்டிய எல்லாவற்றிற்கும் கோடிக்கணக்கான ரூபாய் செலவழிக்க நேரிடும் என்று பலர் கூறியதாகவும் தெரிவித்தார்.

இந்நிலையில், பொலன்னறுவையில் உள்ள சீன – இலங்கை நட்புறவு சிறுநீரக மருத்துவமனை பற்றி அறிந்து கொண்டதும் அங்கு சிகிச்சையை நாடியதாகவும், இம்மருத்துவமனை அனைத்து மருத்துவ சிகிச்சைகள் , அறுவை சிகிச்சைகள் மற்றும் மருந்துகள் உட்பட அனைத்தையும் இலவசமாக வழங்கும் சேவையை அளிப்பதாகவும் அவர் குறிப்பிட்டார்.