நூருல் ஹுதா உமர்
சிட்டிசன் வலையமைப்பு அமைப்பின் ஏற்பாட்டில் உலமாக்கள், பல்துறை சாதனையாளர்கள் மற்றும் மகளிர் சாதனையாளர்களை கௌரவிக்கும் சிறப்பு விழா நேற்று சிறப்பாக நடைபெற்றது.
சமூக முன்னேற்றத்திற்கும் அறிவு வளர்ச்சிக்கும் முக்கிய பங்களிப்பு செய்துள்ள நபர்களை பாராட்டும் நோக்கில் இந்த நிகழ்வு ஏற்பாடு செய்யப்பட்டதாக அமைப்பினர் தெரிவித்தனர்.
இந்நிகழ்வில் மத அறிஞர்கள் (உலமாக்கள்), கல்வி, சமூக சேவை, தொழில், கலாசாரம் உள்ளிட்ட பல்வேறு துறைகளில் சிறந்து விளங்கிய சாதனையாளர்கள் மற்றும் பெண்களின் பங்கு சிறப்பாக மதிப்பளிக்கப்பட்டது. பெண்கள் சமூக முன்னேற்றத்தில் வகிக்கும் முக்கிய பங்கினை வலியுறுத்தும் வகையில் மகளிர் சாதனையாளர்களுக்கான தனிப்பட்ட கௌரவிப்பும் இடம்பெற்றது.
நிகழ்வில் பிரதம அதிதியாக நிந்தவூர் பிரதேச சபை தவிசாளர் சட்டத்தரணி றியாஸ் ஆதம் கலந்து கொண்டார். மேலும் சிறப்பு விருந்தினர்களாக பொலிஸ் உயரதிகாரிகள், பிரதிக்கல்வி பணிப்பாளர் யூ.எல்.எம். சாஜித், ஹில்மாஸ் லங்கா பணிப்பாளர் எம்.ஐ.எம். இல்யாஸ், டெக்னோ பெப் நிறுவுனர் எம்.ஐ. ஹதீப் முஹம்மட் உட்பட சமூக முக்கியஸ்தர்கள், கல்வியலாளர்கள் மற்றும் பல்வேறு துறைகளைச் சேர்ந்தோர் கலந்து கொண்டு கௌரவிக்கப்பட்டவர்களுக்கு பாராட்டுகளைத் தெரிவித்தனர்.
இந்த நிகழ்வு சமூக ஒற்றுமையையும், திறமைகளை அங்கீகரிக்கும் பண்பையும் ஊக்குவிக்கும் ஒரு முக்கிய முயற்சியாகக் கருதப்படுகிறது. நிகழ்வின் இறுதியில் கௌரவிக்கப்பட்டவர்களுக்கு நினைவுச் சின்னங்கள் மற்றும் பாராட்டு சான்றிதழ்கள் வழங்கப்பட்டதுடன் இப்தார் நிகழ்வும் நடைபெற்றது.
No comments: