அமெரிக்காவின் கிழக்குக் கடற்கரைப் பகுதி மாகாணங்கள் பலவற்றிலும் நிலவும் கடும் வெப்ப அலை காரணமாக, இப்பகுதி முழுவதும் நடைபெறவிருந்த சுதந்திர தினக் கொண்டாட்டங்கள் அனைத்தும் ரத்து செய்யப்பட்டன.
சுதந்திர தினத்தை முன்னிட்டு முன்னெடுக்கப்பட்டுள்ள 'கிரேட் அமெரிக்கன் ஸ்டேட் ஃபேர்' (Great American State Fair) கண்காட்சியும் வெப்ப அலை காரணமாக வெள்ளிக்கிழமையன்று மூடப்பட்டது.
தலைநகர் வாஷிங்டன் டி.சி.யில் வெள்ளிக்கிழமையன்று வெப்பக் குறியீடு (heat index) சுட்டெரிக்கும் அளவான 113 டிகிரி ஃபாரன்ஹீட்டை (45 டிகிரி செல்சியஸ்) எட்டும் என்று கணிக்கப்பட்டுள்ளது.
இதனிடையே, வெள்ளிக்கிழமை பிற்பகல், கடும் வெப்பம் காரணமாக நேஷனல் மாலில் நடைபெறும் கிரேட் அமெரிக்கன் ஸ்டேட் ஃபேர் மாலை 5 மணி வரை தற்காலிகமாக மூடப்படும் என்று ஃப்ரீடம் 250 அமைப்பு அறிவித்தது.
கொளுத்தும் வெப்பம் காரணமாக, வர்ஜீனியாவின் லீஸ்பர்க் மற்றும் மேரிலாந்தின் லாரல் மற்றும் டகோமா பார்க் ஆகிய இடங்களில் சுதந்திர தின அணிவகுப்புகள் ரத்து செய்யப்பட்டுள்ளன.
இதனிடையே, சுட்டெரிக்கும் வெயில் நிலவினாலும், வருடாந்திர 'கேபிடல் ஃபோர்த்' (Capitol Fourth) இசை நிகழ்ச்சி வெள்ளிக்கிழமை மாலையில் நடைபெறும் என்று அமெரிக்க நாடாளுமன்றக் காவல் துறை தெரிவித்துள்ளது.
இசை நிகழ்ச்சி திட்டமிட்டபடி இரவு 8 மணிக்குத் தொடங்கும் என்று காவல் துறை தெரிவித்துள்ளது; இருப்பினும், வெப்பம் காரணமாகப் பொதுமக்களுக்கான நுழைவு வாயில்கள் தற்போது இரவு 7 மணிக்கே திறக்கப்படும் என அறிவித்துள்ளனர்.
கடுமையான வெப்பம் காரணமாக, வியாழன் மாலை நடைபெற்ற இசை நிகழ்ச்சி ஒத்திகையில் பொதுமக்கள் கலந்துகொள்வதை காவல் துறையினர் தடை செய்திருந்தனர். இந்த இசை நிகழ்ச்சி வழக்கமாக சுதந்திர தினத்தன்று நடைபெறும், ஆனால் நான்காம் திகதி நேஷனல் மாலில் நடைபெறவிருந்த ஃப்ரீடம் 250 வாணவேடிக்கை மற்றும் நிகழ்ச்சிகள் காரணமாக இது ஜூலை 3 ஆம் திகதிக்கு மாற்றப்பட்டது.
ஜனாதிபதி டொனால்ட் ட்ரம்ப், மவுண்ட் ரஷ்மோரில் உரையாற்றுவதற்கும் வாணவேடிக்கையைக் காண்பதற்கும் வெள்ளிக்கிழமை மாலை தெற்கு டகோட்டாவிற்குப் பயணம் மேற்கொள்கிறார்.
வரலாற்றுச் சிறப்புமிக்க பிரம்மாண்டமான வாணவேடிக்கை நிகழ்ச்சிக்கு முன்னதாக, சனிக்கிழமை மாலையில் வாஷிங்டனில் உள்ள 'நேஷனல் மால்' பகுதியில் ட்ரம்ப் மற்றொரு உரையை நிகழ்த்துவார்.
பாஸ்டன் முதல் பென்சில்வேனியாவின் நாரிஸ்டவுன் மற்றும் கெட்டிஸ்பர்க் தேசிய ராணுவப் பூங்கா வரை, அதிகரித்து வரும் வெப்பநிலைக்கு ஏற்ப திட்டங்கள் மாற்றியமைக்கப்பட்டன.
ரயில் தண்டவாளங்களைப் பாதிக்கக்கூடிய அளவுக்கு நிலவிய கடும் வெப்பம் காரணமாக, வடகிழக்குப் பகுதியில் சில ரயில் சேவைகளை ஆம்ட்ராக் (Amtrak) நிறுவனம் ரத்து செய்துள்ளது.
No comments: