நூருல் ஹுதா உமர்
சாய்ந்தமருது சுகாதார வைத்திய அதிகாரி பிரிவிற்குட்பட்ட கமு/கமு/எம்.எஸ்.காரியப்பர் மற்றும் கமு/கமு/மல்ஹருஸ் சம்ஸ் மகா வித்தியாலயம் ஆகிய பாடசாலைகளில் தரம் 6-இல் பயிலும் மாணவிகளுக்கு கர்ப்பப்பை வாய்ப் புற்றுநோயைத் தடுக்கும் HPV (Human Papilloma Virus) தடுப்பூசி இன்றைய தினம் வழங்கப்பட்டது.
இந்த தடுப்பூசி வழங்கும் நிகழ்வு, சாய்ந்தமருது சுகாதார வைத்திய அதிகாரி வைத்தியர் ஜெ. மதன் அவர்களின் தலைமையில், பொது சுகாதார பரிசோதகர்கள் மற்றும் பொது சுகாதார மருத்துவமாதுக்களின் முழுமையான பங்களிப்புடன் சிறப்பாக முன்னெடுக்கப்பட்டது.
இந்நிகழ்வின் போது, HPV வைரஸ் மற்றும் அதனால் ஏற்படும் நோய்கள் தொடர்பான விழிப்புணர்வு மற்றும் சுகநலக் கல்வி நிகழ்ச்சி மாணவிகளுக்கு வழங்கப்பட்டது. HPV தடுப்பூசி புற்றுநோய் தடுப்பில் மிக முக்கியமான ஒரு பாதுகாப்பு நடவடிக்கையாக விளங்குகிறது என வைத்தியர் ஜெ. மதன் அவர்கள் எடுத்துரைத்தார்.
அவர் மேலும் விளக்குகையில், HPV வகைகள் 16 மற்றும் 18 காரணமாக ஏற்படும் சுமார் 70 சதவீத கர்ப்பப்பை வாய்ப் புற்றுநோய்களை இந்த தடுப்பூசி தடுக்கக்கூடியதாக இருப்பதாகக் குறிப்பிட்டார். அதேபோன்று, கர்ப்பப்பை முன் புற்றுநோய் நிலைகளான CIN 2 மற்றும் CIN 3 உருவாவதையும் இது கணிசமாகக் குறைக்கிறது என்றார்.
மேலும், HPV காரணமாக ஏற்படும் மலப்புற புற்றுநோய், தொண்டை மற்றும் வாய் பகுதி புற்றுநோய், யோனி மற்றும் வெளிப்புற பெண்சாதி உறுப்புப் புற்றுநோய், ஆணுறுப்பு புற்றுநோய் ஆகியவற்றிலிருந்தும் இந்த தடுப்பூசி பாதுகாப்பு வழங்குகிறது என்றும் தெரிவித்தார். HPV வகைகள் 6 மற்றும் 11 காரணமாக உருவாகும் பாலுறுப்பு கட்டிகளை (Genital Warts) 90 சதவீதத்திற்கும் அதிகமாகத் தடுக்கும் திறன் இந்த தடுப்பூசிக்கு இருப்பதாகவும், சமூகத்தில் HPV வைரஸ் பரவலைக் குறைத்து, தடுப்பூசி பெறாதவர்களுக்கும் மறைமுக பாதுகாப்பை (Herd Immunity) வழங்குவதாகவும் அவர் சுட்டிக்காட்டினார்.
இந்த தடுப்பூசி குறைந்தது 10 முதல் 15 ஆண்டுகள் வரை நீண்டகால பாதுகாப்பு அளிக்கக்கூடியதாக இருப்பதுடன், இதுவரை அதன் பாதுகாப்பு குறைவதற்கான எந்தவித ஆதாரங்களும் இல்லை என்றும் அவர் குறிப்பிட்டார். உலகளவில் பரவலாக ஆய்வு செய்யப்பட்ட, பாதுகாப்பான தடுப்பூசி என்பதுடன், ஊசி போட்ட இடத்தில் வலி, சிவப்பு அல்லது லேசான காய்ச்சல் போன்ற சாதாரண பக்கவிளைவுகள் மட்டுமே ஏற்படக்கூடும் என்றும் தெரிவித்தார்.
மேலும், இந்த தடுப்பூசி மகப்பேறு திறனை எந்த வகையிலும் பாதிப்பதில்லை என்றும், எதிர்காலத்தில் புற்றுநோய் சிகிச்சைச் செலவுகளை குறைத்து, பல உயிர்களை காக்கக்கூடிய செலவுத் திறன் மிகுந்த ஒரு முக்கியமான பொது சுகாதார நடவடிக்கையாக இது விளங்குகிறது என்றும் வைத்தியர் ஜெ. மதன் அவர்கள் வலியுறுத்தினார்.
அதேநேரம், HPV தடுப்பூசி கர்ப்பப்பை பரிசோதனைகளான Pap smear அல்லது HPV பரிசோதனைகளுக்கு மாற்றாக அல்ல என்றும், தடுப்பூசி பெற்ற பெண்களும் தொடர்ச்சியாக அவற்றை மேற்கொள்ள வேண்டும் என்றும் அவர் அறிவுறுத்தினார். இருப்பினும், தடுப்பூசி பெற்றவர்களுக்கு கர்ப்பப்பை வாய்ப் புற்றுநோய் ஏற்படும் அபாயம் குறிப்பிடத்தக்க அளவில் குறைவதாகும் என்றும் அவர் தெரிவித்தார்.
No comments: