பத்தரமுல்லை, தியத்த உயன மற்றும் அக்கொன, ஹீனட்டி கும்புர ஆகிய பகுதிகளிலிருந்து வெள்ளவத்தை வரை சூரிய சக்தியில் இயங்கும் படகு சேவை ஆரம்பிக்கப்பட்டுள்ளது.
கொழும்பில் நாளாந்தம் ஏற்படும் போக்குவரத்து நெரிசலுக்குத் தீர்வாக இந்தச் சேவை அமையும் என நகர அபிவிருத்தி மற்றும் வீடமைப்பு அமைச்சு குறிப்பிட்டுள்ளது.
இந்தப் படகுச் சேவை கடந்த செப்டம்பர் 23ஆம் திகதி முதல் அமுல்படுத்தப்பட்டது. அமைச்சர் பிரசன்ன ரணதுங்கவின் அறிவுறுத்தலின் பேரில், நில மீட்பு மற்றும் அபிவிருத்திக் கூட்டுத்தாபனம் மற்றும் ஜென்சோ பவர் டெக்னோலஜி பிரைவேட் லிமிடெட் இணைந்து இந்தப் பயணிகள் படகு சேவையை ஆரம்பித்துள்ளன.
இந்தப் புதிய சேவை குறித்து கருத்து தெரிவித்த நகர அபிவிருத்தி மற்றும் வீடமைப்பு அமைச்சர் பிரசன்ன ரணதுங்க, இலங்கையில் சோலார் பேனல்கள் மூலம் இயக்கப்படும் முதல் படகு சேவை இந்தப் பயணிகள் படகு சேவை என்றும் அதனால் காற்று மாசு இல்லை என்றும் குறிப்பிட்டார்.
இந்தப் படகுகள் மூலம் பத்தரமுல்லை தியத்த உயன மற்றும் ஹீனடி கும்புரவிலிருந்து வெள்ளவத் தையை 30 நிமிடங்களுக்குள் சென்றடையலாம். பத்தரமுல்லையில் இருந்து வெள்ளவத்தைக்குப் பயணிக்க ஒரு நபருக்கு 200 ரூபாவும், அக்கொன, ஹீனடி கும்புர முதல் வெள்ளவத்தை வரை 300 ரூபாவும் அறவிடப்படும்.
இந்தப் படகுச் சேவையானது தினசரி அலுவலக நேரங்களில் இயங்கும் என்பதுடன் ஒரு படகில் 8 பேர் பயணம் செய்வதற்கான வசதிகளை வழங்குகிறது.
பத்தரமுல்லை மற்றும் அதனைச் சுற்றியுள்ள அரச மற்றும் தனியார் அலுவலகங்கள், கேட்வே(Gateway) சர்வதேச பாடசாலை, நாவல திறந்த பல்கலைக்கழகம், 176 பஸ் பாதை, 138 மற்றும் 122 பஸ் பாதைகள், வெள்ளவத்தை புகையிரத நிலையம் ஆகிய இடங்களுக்கு இந்தப் படகுச் சேவை மூலம் இலகுவாகச் செல்ல முடியும்.
No comments: