நாட்டின் பல்வேறு பகுதிகளில் உள்ள எரிபொருள் நிரப்பு நிலையங்களில் மீண்டும் எரிபொருள் பற்றாக்குறை நிலவி வருவதாகச் சுட்டிக்காட்டிய பெற்றோலிய விற்பனையாளர் சங்கத்தின் தலைவர் D.V. சாந்த சில்வா, தனியார் எரிபொருள் நிறுவனங்கள் எதிர்கொள்ளும் நிதி நஷ்டம் தொடர்பாக இதுவரை உரிய தீர்வுகள் எதுவும் அரசாங்கத்தால் எடுக்கப்படவில்லை எனத் தெரிவித்தார்.
இருப்பினும், கௌரவ ஜனாதிபதி அவர்களுடன் கலந்துரையாடி, மின்சக்தி மற்றும் எரிசக்தி அமைச்சர் இது குறித்து பேச்சுவார்த்தை நடத்துவார் என்றும், இதன் மூலம் விரைவில் ஒரு சாதகமான தீர்வு கிடைக்கும் என எதிர்பார்ப்பதாகவும் அவர் குறிப்பிட்டார்.
அத்துடன், கடந்த தினங்களில் பொதுமக்கள் எதிர்கொண்ட கடுமையான அசௌகரியங்களைக் கருத்தில் கொண்டு, LIOC நிறுவனம் தாங்கள் விநியோகிக்கும் எரிபொருள் அளவை வழமையை விட அதிகரிக்கத் தீர்மானித்துள்ளதாக அவர் தெரிவித்தார்.
தனியாருக்கு நஷ்டம் ஏற்பட்டபோதிலும், பொதுமக்களின் சிரமங்களைக் குறைக்கும் நன்னோக்கில் இந்நடவடிக்கை எடுக்கப்பட்டுள்ளதாக அவர் சுட்டிக்காட்டினார்.
மேலும் எரிபொருள் சந்தை நஷ்டம் குறித்து விளக்கிய அவர், டீசலுக்கு ரூ. 70 மானியம் வழங்கப்பட்டாலும், லிட்டர் ஒன்றுக்கு சுமார் ரூ. 140 நஷ்டம் நிலவிய சூழலில், ரூ. 80 உயர்த்தப்பட்ட பின்னரும் இன்னும் லிட்டருக்கு ரூ. 60 நஷ்டம் நீடிப்பதாகக் கூறினார். அதேபோல் பெட்ரோல் லிட்டர் ஒன்றுக்கு சுமார் ரூ. 50 நஷ்டம் ஏற்படுவதாக பெற்றோலிய கூட்டுத்தாபனத் தலைவர் தெரிவித்துள்ளதை மேற்கோள் காட்டிய அவர், தனியார் நிறுவனங்களும் இதே போன்ற கடுமையான நிதி நஷ்டத்தைச் சந்திக்க வேண்டியுள்ளதால், நஷ்டத்தில் வர்த்தகத்தைத் தொடர்ந்து முன்னெடுக்க முடியாது என்றும் வலியுறுத்தினார்.
எனவே, சர்வதேச நாணய நிதியத்தின் (IMF) பரிந்துரைக்கு அமைய, மானியங்கள் இன்றி சந்தை விலையிலேயே எரிபொருளை விற்பனை செய்ய வேண்டிய கட்டாயம் நிலவுவதால், இந்த நஷ்டங்களை ஈடுசெய்வதற்கு பெட்ரோல் மற்றும் டீசல் விலைகள் மேலும் உயர்த்தப்படக்கூடிய சாத்தியக்கூறுகள் உள்ளதாக அவர் தனது செய்தியாளர் சந்திப்பில் மேலும் தெரிவித்தார்.
No comments: