சமாதான நீதிவான்கள் சமூகத்தின் காவலர்களாகச் செயற்பட வேண்டும்-மாவட்ட அரசாங்க அதிபர் கலாமதி

ஏ.எச்.ஏ. ஹுஸைன்
சமாதான நீதிவான்கள் சமூகத்தின் காவலர்களாகச் செயற்பட வேண்டும் என மட்டக்களப்பு மாவட்ட அரசாங்க அதிபர் கலாமதி பத்மராஜா தெரிவித்தார்.

மட்டக்களப்பு மாவட்ட சமாதான நீதவான்கள் சமூக மேம்பாட்டு மையத்தின் ஏழாம் ஆண்டு நிறைவு விழா அமைப்பின் தலைவர் பாவலர் சாந்தி முஹியித்தின் தலைமையில் காத்தான்குடி பிரதேச செயலக மாநட்டு மண்டபத்தில் திங்கட்கிழமை 03.02.2020 இடம்பெற்றது.

நிகழ்வில் கலந்துகொண்டு மேலும் உரையாற்றிய கலாமதி, சமாதான நீதிவான்கள் இன நல்லுறவை வளர்க்கவும் பாடுபடும் அதேவேளை இன முறுகல்கள் ஏற்படும் எந்த சந்தர்ப்பத்திலும் அத்தகைய விரும்பத் தகாத நிகழ்வுகளை நிகழாமல் தடுப்பதற்கு கூடிய பங்கினை ஆற்ற முன் வர வேண்டும்.

கடந்த காலங்களில் இன ரீதியான பிரச்சினைகள் ஏற்பட்ட வேளைகளில் இந்த அமைப்பினர் சிறந்த பங்களிப்பினை செய்திருப்பதையிட்டு அவர்களை நான் பாராட்டுவதுடன் இம்மாவட்டத்தில் செயற்படும் ஏனைய சமாதான நீதவான்களையும் இணைத்து மக்களுக்கு நல்ல பணி செய்ய இந்த அமைப்பு முன்வர வேண்டும்.

இந்த மாவட்டத்தில் தமிழ் முஸ்லிம் இனங்களுக்கிடையில் நல்லுறவு வளர வேண்டியது மிகவும் அவசியமாகும்.

இந்த அமைப்பினால் மக்களின் நலன் கருதி எடுக்கப்படுகின்ற நல்ல முயற்சிகளுக்கு எனது ஒத்துழைப்பு என்றும் இருக்கும் என்பதையும் இச் சந்தர்ப்பத்தில் தெரியப்படுத்த விரும்புகிறேன்' என்றார்.

இந்த நிகழ்வில் இந்த சமூக மயம்பாட்டு மையத்தின் உறுப்புரிமை கொண்ட சமாதான நீதவான்களுக்கு கடமைப் பை மற்றும் கடமை அடையாள அட்டை என்பனவும் அரசாங்க அதிபரால் வழங்கி வைக்கப்பட்டது.

இந்நிகழ்வில் காத்தான்குடி பிரதேச செயலாளர் யூ உதயஸ்ரீதர், மண்முனைபற்று பிரதேச செயலாளர் சத்தியானந்தி நமசிவாயம் உட்பட பல பிரமுகர்கள் பிரசன்னமாகியிருந்தனர்.