அவசர அவசரமாக ஒன்று கூடிய ராஜபக்சாக்கள்- சந்திப்பை புறக்கணித்த கோட்டாபய!

நாட்டில் நிலவும் அரசியல் நிலைமைகள் தொடர்பாக கலந்துரையாடுவதற்காக ராஜபக்ச குடும்பத்தினர் இடையில் விசேட சந்திப்பு நடந்துள்ளதாக தென்னிலங்கை இணையத்தளம் ஒன்று செய்தி வெளியிட்டுள்ளது.

இந்த சந்திப்பு இன்று முற்பகல் இடம்பெற்றதாகவும் தெரிவிக்கப்பட்டுள்ளது.

ராஜபக்ச குடும்பத்தினர் மூத்தவரான சமல் ராஜபக்சவின் கொழும்பு இல்லத்தில் இந்த சந்திப்பு நடந்துள்ளதாக தெரியவருகிறது.

எவ்வாறாயினும் இந்த சந்திப்பில் கோட்டாபய ராஜபக்ச கலந்து கொள்ளவில்லை என கூறப்படுகிறது.

இந்த சந்திப்பின் போது நாட்டில் நிலவும் அரசியல் நிலைமை சம்பந்தமாக விரிவாக கலந்துரையாடப்பட்டுள்ளதாகவும் தெரிவிக்கப்பட்டுள்ளது.

நாட்டில் ஏற்பட்டுள்ள பொருளாதார நெருக்கடி, அதனால் ஏற்பட்டுள்ள விலை அதிகரிப்புகள், எரிபொருள், சமையல் எரிவாயு தட்டுப்பாடு ஆகியன காரணமாக மக்கள் அரசாங்கத்திற்கும் அரச தலைவருக்கும் எதிராக போராட்டங்களை நடத்தி வருகின்றனர்.

மக்களின் போராட்டம் ஆரம்பமான சூழ்நிலையில், அரச தலைவர் மற்றும் பிரதமரை தவிர அரசாங்கத்தின் அமைச்சரவையில் அங்கம் வகித்த ராஜபக்சவினர் அனைவரும் பதவிகளை ராஜினாமா செய்தனர்.

புதிதாக நியமிக்கப்பட்ட அமைச்சரவையிலும் ராஜபக்சவினர் எவரும் இடம்பெறவில்லை என்பதும் குறிப்பிடத்தக்கது.