சமூக ஊடகங்களில் வெளிவரும் போலி முடிவுகளை நம்ப வேண்டாம் - மஹிந்த தேசப்பிரிய

ஜனாதிபதி தேர்தல் தொடர்பான வாக்கொண்ணும் நடவடிக்கை ஆரம்பமாகியுள்ளதாகவும், சமூக ஊடகங்களில் வெளிவரும் தேர்தல் முடிவுகள் தொடர்பான தகவல்கள் அதிகாரபூர்வமானதல்ல எனவும் தேர்தல் ஆணையகத் தலைவர் மஹிந்த தேசப்பிரிய தெரிவித்துள்ளார்.

இது தொடர்பாக அந்த அறிக்கையில் தெரிவிக்கப்பட்டுள்ளதாவது. சனிக்கிழமை (16.11.2019) இரவு 09.40 மணியளவில் அனைத்து தபால் வாக்குகளும் வாக்குகள் எண்ணப்படும் மத்திய நிலையங்களில் அவை இருந்த கடித உறைகள் அகற்றப்பட்டு கணக்கிடும் பணி ஆரம்பிக்கப்பட்டுள்ளது.

சில வாக்குகளை எண்ணும் மத்திய நிலையங்களில் தபால் மூல வாக்குகள் கணக்கிடும் பணி இறுதிக் கட்டத்தை அடைந்துள்ளது. இதுவரையில் சமூக இணையத்தளங்கள் ஊடாக உத்தியோகபூர்வ மற்றும் தபால் மூல வாக்குகள் என தெரிவிக்கப்பட்டு வெளியிடப்பட்டுள்ள அனைத்து ஆவணங்களிலும் உள்ள பெறுபேறு உண்மையானவை அல்ல என்றும் அதில் தெரிவிக்கப்பட்டுள்ளது.

இரத்தினபுரி, கேகாலை, பதுளை ஆகிய மாவட்டங்களில் சனிக்கிழமை (16.11.2019) மாலை பெய்த மழையின் காரணமாக சிறிய அளவில் வெள்ளம் ஏற்பட்டுள்ளது. இதனால் இந்த பகுதியில் உள்ள வாக்குகளை எண்ணும் மத்திய நிலையங்களுக்கு வாக்குப் பெட்டிகளை எடுத்து செல்வதில் தடை ஏற்பட்டது.

சில வாக்கு எண்ணப்படும் மத்திய நிலையங்களில் வாக்குகள் எண்ணும் பணி இரவு 10 மணிக்கு பின்னரே ஆரம்பிக்கப்பட்டது என்றும் தேர்தல்கள் ஆணைக்குழுவின் தலைவர் தெரிவித்துள்ளார். இதன் காரணமாக இந்த மாவட்டங்களின் பெறுபேறுகளை வெளியிடுவதில் தாமதம் ஏற்படும் என்றும் அதில் தெரிவிக்கப்பட்டுள்ளது.

இதேபோன்று வாக்கு பெட்டிகள் எடுத்துச் செல்லப்பட்ட வாகனம் ஒன்று திடீர் விபத்துக்குள்ளானது. இதனால் வாக்கு பெட்டிக்கோ, அதிகாரிகளுக்கோ பாதிப்பு ஏற்படவில்லை. இந்த அதிகாரிகளும் பாதுகாப்பான முறையில் பதுளை வாக்குகள் எண்ணும் மத்திய நிலையத்திற்கு சென்றுள்ளனர். இதேபோன்று வாக்கு பெட்டிகளும் பாதுகாப்பான முறையில் எடுத்து செல்லப்பட்டுள்ளன.