மட்டக்களப்பு திமிலைதீவில் கனரக வாகனம் மோதிய விபத்தில் உயிரிழந்த ஆசிரியை மதிவதனி கமலநாதனுக்கு நீதி கோரியும், பாடசாலை மாணவர்கள் மற்றும் ஆசிரியர்களின் பாதுகாப்பை உறுதிப்படுத்துமாறும் வலியுறுத்தி, வவுணதீவு பிரதேச செயலகத்திற்கு முன்னால் திங்கட்கிழமை (12) கவனயீர்ப்பு ஆர்ப்பாட்டம் முன்னெடுக்ப்பட்டது.
‘நீதிக்கான மக்கள் குரல்’ அமைப்பின் தலைவரும், தமிழ்த் தேசிய மக்கள் முன்னணியின் தேசிய அமைப்பாளருமான தர்மலிங்கம் சுரேஷ் தலைமையில் ஏற்பாடு செய்யப்பட்ட இவ்வார்ப்பாட்டத்தில், ஆசிரியர்கள், மாணவர்கள், பிரதேச சபை உறுப்பினர்கள், மனித உரிமைச் செயற்பாட்டாளர்கள் உள்ளிட்ட நூற்றுக்கும் மேற்பட்டோர் கலந்துகொண்டனர்.
இதன்போது, “கனரக வாகனங்களின் கட்டுப்பாடற்ற போக்குவரத்தை நிறுத்து”, “மாணவர்களின் பாதுகாப்பை உறுதிப்படுத்து”, “உயிரிழந்த ஆசிரியை மதிவதனிக்கு நீதி வேண்டும்”, “சட்டவிரோத மணல் அகழ்வை உடனடியாக நிறுத்து” உள்ளிட்ட கோஷங்களை எழுப்பி ஆர்ப்பாட்டத்தில் ஈடுபட்டனர்.
தொடர்ந்து, மண்முனை மேற்கு பிரதேசத்தில் மணல் அகழ்வையும் கனரக வாகனப் போக்குவரத்தையும் ஒழுங்குபடுத்தி, மாணவர்கள் மற்றும் ஆசிரியர்களின் பாதுகாப்பை உறுதிப்படுத்துமாறு கோரும் மகஜர், வவுணதீவு பிரதேச செயலாளரிடம் கையளிக்கப்பட்டது. இதையடுத்து ஆர்ப்பாட்டக்காரர்கள் கலைந்து சென்றனர்.
No comments: